Home » સુશાંતના પિતાના ધડાકા પછી અર્નબનો મુંબઈ પોલીસ સામે બૉમ્બ

સુશાંતના પિતાના ધડાકા પછી અર્નબનો મુંબઈ પોલીસ સામે બૉમ્બ

by Jaywant Pandya
સુશાંતસિંહ

સુશાંતસિંહ રાજપૂતના મૃત્યુ કેસમાં તેના પિતાએ સુશાંતની ગર્લફ્રેન્ડ રિયા ચક્રવર્તી સામે ફરિયાદમાં ગંભીર આક્ષેપો કર્યા છે

સારદર્શી

( અંક -૩૬ દિ. ૨૮/૭/૨૦૨૦)

◾ ભારતના વિરોધ અને અમેરિકા દ્વારા યુદ્ધની તૈયારીઓ જોતાં ચીને પોતાની કૂકરીઓ ગોઠવવા લાગી છે. અગાઉ પાકિસ્તાન પર પોતાના પ્રભુત્વનો ઉપયોગ કરીને ઇમરાન ખાન પાસે બાંગ્લાદેશનાં વડાં પ્રધાન શેખ હસીના સાથે ફોન પર કોરોના વાઇરસના નામે વાત કરાવી હતી અને એવો સંદેશો ફેલાવ્યો હતો કે પાકિસ્તાન અને બાંગ્લાદેશ ફરીથી નજીક આવી રહ્યાં છે પરંતુ આ વાત ખોટી સાબિત થઈ અને ગઈકાલે આ કૉલમમાં લખ્યા પ્રમાણે બાંગ્લાદેશના વિદેશ પ્રધાને કહ્યું કે બાંગ્લાદેશ પાકિસ્તાનના ૧૯૭૧ના નરસંહાર અને બળાત્કારોને ભૂલ્યું નથી. ફૉન પર વાતચીત માત્ર ઔપચારિકતા જ હતી. હવે ચીને પાકિસ્તાનને મોટો ભાઈ બનાવી અને નેપાળ તથા અફઘાનિસ્તાન સાથે મળી અને ચાર દેશોનું જૂથ રચવા પ્રયાસ આદર્યો છે તેમજ અફઘાનિસ્તાન અને નેપાળને પાકિસ્તાન જેવા લોખંડી ભાઈમાંથી શીખવા કહ્યું છે. નેપાળ તો અત્યારે ચીનના પૂરેપૂરા પ્રભાવ હેઠળ છે જ પરંતુ અફઘાનિસ્તાન પણ જો ચીનના પ્રભાવ હેઠળ આવી જાય તો ભારત માટે ખૂબ ખરાબ સ્થિતિ ગણાશે.

◾ અમેરિકા વારંવાર ચીનને યુદ્ધ માટે ચેતવણી આપી રહ્યું છે અને સાથોસાથ ઉશ્કેરી રહ્યું છે આના સંકેતો દરિયામાં તો મળી જ ગયા હતા પરંતુ અમેરિકાનાં યુદ્ધ વિમાનો પણ ચીનની સરહદની ખૂબ જ નજીક પહોંચી ગયાં હતાં. એક વિમાન તો શાંઘાઇથી માત્ર ૭૬.૫ કિલોમીટર દૂર સુધીના અંતરે પહોંચી ગયું હતું.

◾ લદાખ સરહદે ચીની સૈનિકો અડીંગો જમાવીને બેઠા છે અને ભારતની અનેક વાર ચેતવણી છતાં પણ સૈનિકો પાછા જવાનું નામ નથી લેતા જેનું કારણ ઉપરથી આવેલો આદેશ છે પરંતુ આ સ્થિતિ ચીનના સૈનિકો માટે લાંબો સમય સારી રહે એવી નથી. ભારતીય સેનાનાં સૂત્રો મુજબ સપ્ટેમ્બરથી લદાખમાં ખૂબ જ ઠંડી શરૂ થશે. અહીં ઘણી વાર -૨૫ અંશ તાપમાન થઈ જતું હોય છે. ભારતીય સૈનિકો આવા વાતાવરણમાં પગ પર ચોકી કરવા માટે ટેવાયેલા છે જ્યારે ચીનના સૈનિકોને એક તો ફરજિયાત ભરતી કરાયેલા છે અને બીજું તેઓ વાહનોમાં ચોકી કરે છે. આથી તેમના ભારત સામે લડીને વીરગતિ પ્રાપ્ત કરવા કરતાં ઠંડી સામે હારી જઈને મૃત્યુ થાય તેવી સંભાવના વધુ છે. ભૂતકાળમાં સિયાચીનમાં ભારત અને પાકિસ્તાનના કેટલાક સૈનિકોનાં હિમસ્ખલનના કારણે મૃત્યુ થયેલાં છે. ચીનને અમેરિકા સાથેની કૉલ્ડ વૉર તો નડશે જ પરંતુ જિનપિંગના પાપે, ચીનના સૈનિકોને આ કૉલ્ડ વૉર નડશે.

◾આજે દિવસના મોટા સમાચાર રાત્રે આવ્યા. સુશાંતસિંહના કેસમાં કંગના રનૌત, શેખર સુમન, શેખર કપૂર વગેરેએ દબાણ ઊભું કર્યું અને ‘રિપબ્લિક ભારત’ ચેનલ તેમાં જોડાઈ તે પછી આદિત્ય ચોપરા, મહેશ ભટ્ટ, કરણ જૌહરના ધર્મ પ્રૉડક્શન્સના મેનેજર વગેરેને બોલાવવામાં આવ્યા. (તો પણ કરણને તો ન જ બોલાવવામાં આવ્યો.) અને શિવસેનાએ જે કહ્યું, ગૃહ પ્રધાન અનિલ દેશમુખે જે કહ્યું તેના પરથી સ્પષ્ટ હતું કે આ કેસને સુશાંતને માનસિક બીમાર કહીને સંકેલી દેવામાં આવશે. શનિવારે અનિલ દેશમુખે સુશાંતના મૃત્યુને આપઘાત ગણાવ્યો. જ્યાં સુધી તપાસનું તારણ ન આવે ત્યાં સુધી મૃત્યુને આપઘાત કેવી રીતે કહી શકાય? પરંતુ આજે રાતની શરૂઆતના સમયમાં એક સમાચાર આવ્યા કે સુશાંતના પિતાએ અભિનેત્રી અને સુશાંતની ગર્લફ્રેન્ડ રિયા ચક્રવર્તી સામે ફરિયાદ નોંધાવી છે. આના કારણે ખળભળાટ મચી ગયો. ‘ઇન્ડિયા ટીવી’ પર રજત શર્માએ પોતાના વિશ્લેષણમાં કેસની દિશા બદલાઈ હોવાનું કહી કરણ આણિ ગેંગને બચાવવા પ્રયાસ કર્યો હોય તેમ લાગ્યું કારણકે તેમણે કહ્યું કે અત્યાર સુધી બધા પોતપોતાના એજન્ડા ચલાવતા હતા. કોઈ સગાવાદ-પરિવારવાદની વાત કરતું હતું તો કોઈ ગેંગ બનાવીને આઉટસાઇડરને હેરાન કરવાની વાત કરતું હતું. પરંતુ સુશાંતના પિતાની ફરિયાદ પછી હવે અલગ રીતે વિચારવું પડશે. ઝી ન્યૂઝ પણ આ કેસને ખાસ મહત્ત્વ નથી આપતું. આજે રાત્રે ‘રિપબ્લિક ભારત’ પર મુંબઈ પોલીસનો સુશાંતના મૃત્યુની શરૂઆતનો એક લીક વિડિયો બતાવીને ‘રિપબ્લિક ભારત’ પર અર્નબ ગોસ્વામીએ તાપમાન ગરમ કરી દીધું. વિડિયોમાં પોલીસ બોલે છે કે યે વિડિયો લિક હો ગયા તો હમારી ઇન્વેસ્ટિગેશન બરબાદ હો જાયેગી. અર્થાત્ પોલીસે શરૂઆતથી નક્કી કરી લીધું હતું કે તપાસનો અંત શું હશે?

હવે વાત કરીએ સુશાંતના પિતાની ફરિયાદની. તેમાં પણ ગંભીર આક્ષેપો છે કે રિયાએ કોઈક રીતે બ્લેકમેઇલ દ્વારા સુશાંતના જીવન પર કબજો કરી લીધો હતો. તેનાં ક્રેડિટ કાર્ડથી માંડીને મોબાઇલ બધું જ રિયાના કબજામાં હતું. કોઈ નિર્દેશકને સુશાંતનો સંપર્ક કરવો હોય તો રિયા દ્વારા કરવો પડતો હતો અને રિયા શરત મૂકતી હતી કે તેને ફિલ્મમાં મુખ્ય હિરોઇન લેવામાં આવે. રિયાએ સુશાંતના પરિવારજનોનો સંપર્ક તોડાવી નાખ્યો. સુશાંતના ખાતામાં ૧૭ કરોડ રૂપિયા હતા પરંતુ ૧૫ કરોડ રૂપિયા તેમાંથી ઉપાડી અજાણ્યા ખાતામાં નાખી દેવામાં આવ્યા. સુશાંતના પરિવારજનોને સુશાંત ડિપ્રેશનમાં હોવાનું પસંદ નહોતું. સુશાંત કુર્ગમાં ઑર્ગેનિક ખેતી કરવા જવા માગતો હતો પરંતુ રિયાએ તેનો મેડિકલ રિપૉર્ટ મિડિયામાં આપી દેવાની અને સુશાંત પાગલ થઈ ગયો છે તેમ કહી દેવાની ધમકી આપી તેને તેમ કરતા રોક્યો હતો. છેલ્લે જ્યારે રિયાને લાગ્યું કે તેની વાત સુશાંત નહીં માને અને બૅન્ક બેલેન્સ પણ ખાલી થઈ રહ્યું છે તો તે ઘરનો બધો સામાન, રોકડ રકમ, ઘરેણાં, લેપટોપ, પાસવર્ડ, ક્રેડિટ કાર્ડ, સુશાંતના દસ્તાવેજો, સુશાંતની સારવારના કાગળો લઈને ચાલી ગઈ.

અર્નબની આજની ચર્ચામાં એ મુદ્દો પણ સ્પષ્ટ થયો જે રજત શર્માના એ પૉઇન્ટને ખોટો ઠરાવે છે કે માત્ર રિયા જ જવાબદાર ગણી શકાય અને કંગના મહેશ ભટ્ટ વગેરેના મુદ્દા ઉઠાવી રહી હતી તે ખોટા હતા. અર્નબે કહ્યું કે મહેશ ભટ્ટ, રુમી જાફરી વગેરે લોકો રિયાનું નામ આવ્યું ત્યારથી જ તેને બચાવવા લાગી ગયા હતા અને તેઓ સુશાંતને પાગલ, માનસિક રીતે બીમાર ગણાવવા માંડ્યા હતા.

હવે બિહાર પોલીસ ચિત્રમાં આવી છે. પરંતુ અર્નબનો પ્રશ્ન એ પણ છે કે બિહારના મુખ્ય પ્રધાન આ મુદ્દે કેમ કંઈ બોલતા નથી? રાજદ પણ સીબીઆઈ તપાસની માગણી કરે છે. જેના પર હવે શંકાની ઘેરી સોય છે તે રિયા તો સીબીઆઈની તપાસ કરી ચૂકી છે. તો પછી સામાન્યત: સીબીઆઈને હથિયાર બનાવવાનો આક્ષેપ પામનાર મોદી સરકાર કેમ સીબીઆઈની તપાસ જાહેર કરવામાં ખચકાટ અનુભવી રહી છે? તેના બોલકા નેતાઓમાં સુબ્રમણિયન સ્વામી સિવાય કેમ કોઈ કંઈ બોલતું નથી, જ્યારે કે સુશાંત તેના જ ધારાસભ્ય નીરજસિંહનો પિતરાઈ હતો. તમારા પક્ષના ધારાસભ્યના પિતરાઈ અને તે પણ આટલો મોટો અભિનેતા હોય અને તમે જે રાજકીય વર્તુળમાં અનુભવ્યું હોય તે સગાવાદ-પરિવારવાદ-બહારનાને હેરાન કરવો તે બધું હિન્દી ફિલ્મોદ્યોગમાં થાય તે મુદ્દે નરેન્દ્ર મોદી સરકાર કેમ ચૂપ છે?

અર્નબે એક બીજો આક્ષેપ ચેનલ (ઇન્ડિયા ટુડેએ)નું નામ લીધા વગર એ પણ કર્યો કે જાવેદ અખ્તર-ફરહાનનો ઇન્ટરવ્યૂ કરીને ચેનલે એ સાબિત કરવાની કોશિશ કરી કે હિન્દી ફિલ્મમાં પરિવારવાદ જેવું નથી અને જો હોય તો બધે જ છે. અને મુંબઈ પોલીસની લીક તપાસને ટાંકીને કહ્યું કે તપાસમાં કંઈ ખોટું નથી થયું.

અત્યાર સુધી પ્રશ્ન એ હતો કે સુશાંતના મૃત્યુની પ્રમાણિક તપાસ થાય તે માટે ઘણા લોકો મથી રહ્યા હતા પરંતુ તેનો પરિવાર કેમ ચૂપ હતો? આજે પ્રશ્ન એ ઊભો થયો કે સુશાંતનો પરિવાર આટલા દિવસ પછી કેમ ફરિયાદ નોંધાવવા આગળ આવ્યો? આનો જવાબ પણ સુશાંતના પરિવાર પાસેથી મળ્યો. સુશાંતની બહેન વગેરેના ટ્વીટ પરથી એવું લાગતું હતું કે મુંબઈ પોલીસને તપાસ કરવા દેવી જોઈએ અને બીજું કે સુશાંત સાથેનો સંપર્ક ઓછો હોવાથી તેમની પાસે માહિતી પણ ઓછી હતી, પરંતુ મુંબઈ પોલીસ અને સરકારના વલણ પરથી લાગ્યું કે તપાસમાં ફીંડલું વાળી દેવાશે. સુશાંતને માનસિક બીમાર સાબિત કરી આપઘાત સાબિત કરી દેવાશે. અને વિગતો પણ મળી. એટલે આજે તેમણે બિહાર પોલીસ સમક્ષ ફરિયાદ નોંધાવી.

◾એક બીજા મોટા સમાચાર એ છે કે બંધારણના નામે સેક્યુલરિઝમ (અને ખરા અર્થમાં સેક્યુલરિઝમ નહીં, જો ખરા અર્થમાં હોય તો તેમાં માત્ર મુસ્લિમ અને ખ્રિસ્તીની જ વાત ન થતી રહે અને હિન્દુ વિરોધ ન થતો રહે) અને સૉશિયલિસ્ટની દલીલો થતી રહેતી હોય છે. હવે સર્વોચ્ચમાં વકીલો બલરામસિંહ અને કરુણેશકુમાર શુક્લએ વિષ્ણુશંકર જૈન દ્વારા અરજી કરી છે કે બંધારણમાંથી આ બે શબ્દો હટાવી દેવામાં આવે કારણકે તે કટોકટી દરમિયાન કોઈ પણ ચર્ચા વગર કે સંસદીય કાર્યવાહી વગર દાખલ કરી દેવાયા હતા અને તે સમયે વિપક્ષના તમામ નેતાઓ જેલમાં હતા. ૩૭૦, ટ્રિપલ તલાકની જેમ આ મુદ્દાનો પણ તાર્કિક નિવેડો આવવો જોઈએ.

વડા પ્રધાન મોદી મસ્જિદમાં જાય તો કોઈ વાંધો નહીં, પણ શ્રી રામમંદિર ભૂમિપૂજનમાં જાય તો સેક્યુલરોના પેટમાં દુઃખાવો થાય છે

◾ પાંચ ઑગસ્ટ નજીક આવી રહી છે અને ભારતમાં બધું ધ્યાન અયોધ્યામાં રામમંદિરના ભૂમિપૂજન પર છે તેવું લાગી રહ્યું છે. જોકે મોદી સરકાર બીજી બધી બાબતોમાં પણ સજાગ રહેતી હોય છે અને આ બાબતે પણ હશે જ તેમ છતાં પાકિસ્તાન તરફથી એક ચિંતાજનક સમાચાર મળ્યા છે કે પાંચ ઑગસ્ટે જમ્મુ-કાશ્મીરમાંથી ૩૭૦ કલમ હટાવવામાં આવી તેની તિથિ પર તેણે ૧૮ મુદ્દાનો એક કાર્યક્રમ ઘડ્યો છે. અન્ય મુદ્દા તો જાણવા નથી મળ્યા પરંતુ એક મુદ્દો એ છે કે વડા પ્રધાન ઈમરાન ખાન તે દિવસે તેણે પચાવી પાડેલા કાશ્મીરમાં મુઝફ્ફરાબાદમાં જશે અને ત્યાં ભાષણ આપશે અને તેનું જીવંત પ્રસારણ થશે. બીજો મુદ્દો એ છે કે પાકિસ્તાન વિદેશી પત્રકારોને તે પ્રદેશની મુલાકાત કરાવશે. આ સાથે પાકિસ્તાન જમ્મુ કાશ્મીરના મુદ્દે તુર્કી, મલયેશિયા અને ચીનને પોતાની સાથે લેવાનો પ્રયત્ન કરશે. મલયેશિયાએ અને તુર્કી અગાઉ પણ આ મુદ્દે પાકિસ્તાનને સાથ આપ્યો હતો પરંતુ મલયેશિયાના વડા પ્રધાન મહાતીર મોહમ્મદનું અવસાન થયું છે. તેમના સ્થાને મુહ્યિદિન યસીને એક માર્ચે શપથ લીધા હતા. આ ઉપરાંત પામ ઓઇલ નિકાસ અટકાવીને ભારતે મલયેશિયાને ફટકો પણ આવ્યો હતો એટલે જવું રહેશે કે મલયેશિયા કેવું વલણ લે છે.

◾ પશ્ચિમી દેશો પોતાના વિરોધી દેશોમાં જે લોકો વિદ્રોહી કે અસંતુષ્ટ હોય તેનું નૉબેલ, ઑસ્કાર, મેગ્સેસે કે પુલિત્ઝર જેવા એવૉર્ડથી સન્માનિત કરે છે. પાકિસ્તાને પણ આ નીતિ અપનાવતા, તેના ઉપલા ગૃહ સેનેટે કાશ્મીરના અલગતાવાદી નેતા સૈયદ અલી શાહ ગિલાનીને નિશાન-એ-પાકિસ્તાન એવૉર્ડથી સન્માનિત કરવા ઠરાવ કર્યો છે. આ ઉપરાંત ઇસ્લામાબાદમાં બનનારી એક યુનિવર્સિટીનું નામ પણ ગિલાનીના નામ પરથી રાખવા ઠરાવ કર્યો છે.

◾ હમણાં સંયુક્ત રાષ્ટ્રનો એક અહેવાલ આવ્યો હતો જેમાં કહ્યું હતું કે દક્ષિણ ભારતમાં ખાસ કરીને કેરળ અને કર્ણાટકમાં આઈએસઆઈએસ સાથે સંકળાયેલા અનેક ત્રાસવાદીઓ છે પરંતુ એકવાર તેમાં ભૂલી જવાઈ છે કે તમિલનાડુમાં પણ મોટા પ્રમાણમાં ત્રાસવાદીઓ છે. આ વાત રા. ત.સં (એનઆઈએ)ની તપાસમાં બહાર આવેલી છે. ૨૦૧૬ પછી દક્ષિણનાં રાજ્યોમાં મોટા પાયે ત્રાસવાદીઓની ધરપકડ થયેલી છે અને તેમાં તમિલનાડુના ત્રાસવાદીઓનો પણ સમાવેશ થાય છે અને તેમની પાસેથી જિહાદી પ્રચાર સહિત ઘણી વાંધાજનક સામગ્રી પણ મળી આવી હતી. આ ત્રાસવાદીઓ દક્ષિણ ભારતનાં ગાઢ જંગલોમાં પોતાના અડ્ડા બનાવવાની યોજના કરી રહ્યા હતા. રા.ત.સં.ના સૂત્ર મુજબ કર્ણાટકમાં સમસ્યા છે પરંતુ કેરળ અને તમિલનાડુના ત્રાસવાદીઓ વચ્ચેની સાંઠગાંઠ ગંભીર સમસ્યા છે. ૨૦૧૯માં રા.ત.સં એ પાડેલા દરોડામાં એવી માહિતી બહાર આવી હતી કે કોઇમ્બતુર મૉડ્યુલ કેરળના મૉડ્યુલની જેમ જ કામ કરી રહ્યું હતું અને તેમની યોજના દક્ષિણ ભારતમાં અનેક સ્થળો પર હુમલાઓ કરવાની હતી.

◾ રા.ત.સં.એ મહારાષ્ટ્રના ભીમા-કોરેગાંવ કેસના સંદર્ભમાં દિલ્લી વિશ્વ વિદ્યાલયના એસોસિએટ પ્રૉફેસરની આજે ધરપકડ કરી. કુન્હુ મોહમ્મદના પુત્ર ૫૪ વર્ષીય હનીબાબુ મુસાલિયારવીત્તીલ થરાયીલ નામના આ પ્રાધ્યાપક ઉત્તર પ્રદેશના ગૌતમ બુદ્ધ નગરના નિવાસી છે. તેઓ અંગ્રેજી વિભાગમાં ભણાવે છે. રા.ત.સં.નું કહેવું છે કે હનીબાબુ નક્સલવાદી પ્રવૃત્તિઓમાં લિપ્ત હતા અને માઓવાદી વિચારધારા ફેલાવી રહ્યા હતા. ૩૧ ડિસેમ્બર ૨૦૧૭ના રોજ પૂણેના શનિવારવાડા ખાતે કબીર કલા મંચ દ્વારા એલગાર પરિષદ કાર્યક્રમ દરમિયાન લોકોને ભડકાવવાનો અને ઉશ્કેરણીજનક પ્રવચન આપવાનો આ કેસ છે.

◾ જમ્મુ-કાશ્મીરના પૂર્વ મુખ્યપ્રધાન અને નેશનલ કૉન્ફરન્સના નેતા ઉમર અબ્દુલ્લાએ ‘ઇન્ડિયન એક્સપ્રેસ’ને આપેલા એક ઇન્ટરવ્યૂમાં બળાપો કાઢતાં કહ્યું છે કે આમ તો ગયા વર્ષના એપ્રિલથી જ બધું રંધાઈ રહ્યું હતું પરંતુ ૩૭૦ દૂર થશે ૩૫-એ દૂર થશે અને જમ્મુ કાશ્મીર કેન્દ્રશાસિત પ્રદેશ બની જશે- આ બધું એકસાથે થશે તેવી કલ્પના અમે લોકોએ કરી નહોતી. તેમને મુક્ત કરવામાં આવ્યા પછી તેઓ પક્ષના લોકોને કેમ મળતા નથી તેવા પ્રશ્નના જવાબમાં તેમણે કહ્યું હતું કે અમારા પક્ષના લોકોને ગેરકાયદે રીતે અટકાયતમાં લેવામાં આવ્યા છે તેઓ બહાર નીકળવા જાય તો દરવાજા પર રક્ષકો તેમને બહાર નીકળવાની મનાઈ છે તેવું કહી દે છે. એટલે જો ઉચ્ચ ન્યાયાલયમાં જાય તો સરકાર એમ કહે કે તેમની અટકાયત કરવામાં આવી નથી. આ ખરેખર ખોટું નથી સાચું જ છે. પરંતુ આમાં સરકારે ખોટું શું કર્યું છે? જેવા સાથે તેવા થવું જ પડે. ત્રાસવાદ ફેલાવવામાં કોઈ કસર ન રાખનાર જમ્મુ કાશ્મીરના લોકોને કે તેના પોષકોને જો આ રીતે અટકમાં ન લે તો ન્યાયલયમાંથી છૂટી જાય અને ૩૭૦ દૂર થાય ત્યારે કાશ્મીરમાં હિંસા ફેલાવી દે અને વિશ્વનું ધ્યાન કાશ્મીર પર કેન્દ્રિત થઈ જાય અને ન છૂટકે કેન્દ્ર સરકારે ઝૂકવું પડે અને ૩૭૦ બાબતે પારોઠનાં પગલાં ભરવાં પડે.

◾ શ્રી રામમંદિરના ભૂમિપૂજન પહેલાં અયોધ્યામાં સરયૂ તટ પર ઉત્સવની ઉજવણી શરૂ થઈ ગઈ છે. સરયૂ તટ પર ૨૧૦૦૦ દીપક પ્રગટાવવા આવ્યા હતા તેમજ દીપક દ્વારા શ્રી રામ અને ॐની આકૃતિ રચવામાં આવી હતી.

◾ ગઈકાલે એવા સમાચાર આવ્યા હતા કે રામ મંદિર પરિસરમાં આ મંદિરનો ઈતિહાસ ટાઈમ કેપ્સ્યુલ રૂપે જમીનની અંદર રાખવામાં આવશે અને આમ થાત તો એ સારી બાબત પણ હોત પરંતુ ખબર નહીં કેમ આ સમાચાર ખોટા ઠર્યા છે અને રામ મંદિર તીર્થક્ષેત્ર ટ્રસ્ટના મહામંત્રી ચંપત રાયે આ સમાચારને અફવા ગણાવી ટાઇમ કેપ્સ્યુલ મુકાવાની વાતનું ખંડન કર્યું છે. ગઈકાલે સમાચાર સંસ્થા આઈએએનએસએ આ ટ્રસ્ટના અન્ય સભ્ય કામેશ્વર ચૌપાલને ટાંકીને આ સમાચાર આપ્યા હતા. આનો અર્થ એ થયો કે ટ્રસ્ટના સભ્યોની વચ્ચે સંદેશાની આપલેમાં ક્યાંક ખામી છે.

◾ ઘણાં ઘરોમાં કોઈ સારો પ્રસંગ હોય ત્યારે એવું બનતું હોય છે કે ફૂઆ, જમાઈ, મામા, માસી જેવાં સંબંધી કોઈ પરંપરા કે પ્રથાના નામે (આમ તો કરવું જ જોઈએ કે આમ તો ન જ કરાય) પ્રસંગની મજા બગાડતા હોય છે પરંતુ પોતાને ત્યાં જ્યારે પ્રસંગ હોય ત્યારે પાછો પરંપરા કે પ્રથાનો છેદ ઉડાડતા હોય છે. આવું જ સેંકડો વર્ષોના સંઘર્ષ પછી શ્રી રામ મંદિરના ભૂમિપૂજનના આવેલા પાવન અવસરે થઈ રહ્યું છે. વડા પ્રધાન નરેન્દ્ર મોદીએ શ્રી રામમંદિરના ભૂમિપૂજનમાં ન જવું જોઈએ અને જો તેમ કરશે તો બંધારણનો ભંગ ગણાશે તેવી સેક્યુલરો અને ડાબેરીઓ દલીલ કરે છે પરંતુ તેમને કોઈ પૂછો કે વડા પ્રધાન બે વર્ષ પહેલાં ઈન્દોરની મસ્જિદમાં ગયા, જાપાનના વડા પ્રધાન આબે સાથે અમદાવાદની સીદી સૈયદની મસ્જિદમાં પણ ગયા, ત્યારે બંધારણનો ભંગ નહોતો થતો? અગાઉના વડા પ્રધાનો ઇફ્તાર પાર્ટીમાં જતા હતા ત્યારે બંધારણનો ભંગ નહોતો થતો? અને શ્રી રામ માત્ર હિન્દુઓ માટે નહીં, મુસ્લિમો માટે પણ ભગવાન છે. સેક્યુલર અને ડાબેરીઓનું તો સમજાય પરંતુ શિવસેના એક સમયે ભાજપ કરતાં પણ પોતાને કટ્ટર હિન્દુત્વવાદી પક્ષ કહેતી હતી અને ૧૯૯૨માં અયોધ્યામાં વિવાદિત ઢાંચાના ધ્વંસ પોતે કર્યો હોવાનું બાળ ઠાકરે હિંમતથી કહેતા હતા પણ તેમના પુત્ર ઉદ્ધવ ઠાકરે શ્રી રામમંદિર ભૂમિપૂજનમાં વડા પ્રધાન નરેન્દ્ર મોદીએ ન જવું જોઈએ અને તે માત્ર વિડિયો કૉન્ફરન્સિંગથી કરવું જોઈએ તેવો રાગ આલાપ્યો હતો. હવે એ જ ઉદ્ધવ ઠાકરેની સરકાર બકરી ઈદમાં છૂટછાટો આપે તેવી સંભાવના છે ઉદ્ધવ ઠાકરે તો બકરી ઈદ પ્રતીકાત્મક સ્વરૂપ એ મનાવવા અપીલ કરી હતી પરંતુ મહા વિકાસ અઘાડીના મુસ્લિમ નેતાઓ શરદ પવાર, કૉંગ્રેસ નેતા બાળાસાહેબ થોરાટને અને ગૃહ પ્રધાન તેમજ રા.કૉં.પા.ના અનિલ દેશમુખેને મળ્યા હતા અને આ બંને નેતાઓ થોરાટ-દેશમુખ ગઈ રાત્રે મુખ્ય પ્રધાન ઉદ્ધવ ઠાકરેને મળ્યા હતા. ‘ટાઇમ્સ નાવ’ ચેનલે સૂત્રોને ટાંકીને જણાવ્યું છે કે મહા. સરકાર બકરી ઈદની ઉજવણી થવા દેવા માટે નવી માર્ગદર્શિકા બહાર પાડશે. માત્ર મહારાષ્ટ્ર જ નહીં, કર્ણાટકમાં પણ ભાજપ સરકારના રાજમાં બકરી ઈદની છૂટછાટો અપાઈ છે. અને આજે પશ્ચિમ બંગાળમાં આજે ઘર-વાસ ૩૧ ઑગસ્ટ સુધી લંબાવવામાં આવ્યો છે પરંતુ બકરી ઈદના દિવસે ૧ ઑગસ્ટે રાજ્યમાં ઘર-વાસ નહીં લાગે!!!

◾ ઉદ્ધવ ઠાકરેએ વિપક્ષને પડકાર ફેંક્યો હતો કે તે તેમની સરકાર ઉથલાવી બતાવે. પરંતુ વિપક્ષ કરતાં તેમના જ સાથીઓ જ તેમને મૂંઝવણમાં મૂકી રહ્યા છે. ઉપર જણાવ્યું તેમ, બકરી ઈદ અંગે તેઓ ન માન્યા તો મ.વિ.અ.ના મુસ્લિમ નેતાઓ શરદ પવારને મળવા પહોંચી ગયા. બીજી તરફ, શરદ પવાર પણ ઉદ્ધવ ઠાકરે પર તીર છોડવાનો મોકો છોડતા નથી. એક મરાઠી ચેનલને ઇન્ટરવ્યૂમાં પવારભાઉએ કહ્યું કે “ઉદ્ધવ ઠાકરેએ એક જગ્યાએ બેસીને વહીવટ ન કરવો જોઈએ. તેમણે રાજ્યમાં ફરતા રહેવું જોઈએ.” ઉદ્ધવ ઠાકરે આ કોરોના કાળમાં તેમના ઘરથી બહાર નીકળ્યા જ નથી તે પ્રશ્ન પર તેઓ જવાબ આપી રહ્યા હતા. પવારની વાત સાચી છે. મહારાષ્ટ્રમાં કોરોનાના લીધે આટલી ખરાબ સ્થિતિ હોય ત્યારે ઉદ્ધવ ઘરમાં પૂરાઈ રહે તે કેમ ચાલે? ગુજરાતમાં સુરતમાં પરિસ્થિતિ વણસી તો મુખ્ય પ્રધાન વિજય રૂપાણી અને નીતિન પટેલ ત્યાં ગયા હતા. ઉત્તર પ્રદેશમાં યોગી આદિત્યનાથ ૨૫મી જુલાઈએ અયોધ્યામાં શ્રી રામમંદિર ભૂમિપૂજનના કાર્યક્રમની તૈયારીઓનું નિરીક્ષણ કરવા ગયા હતા. આસામના મુખ્ય પ્રધાન સર્બાનંદ સોનોવાલ પૂરગ્રસ્ત લાલ્પુખુરી વિસ્તારની મુલાકાતે આજે ગયા હતા.

◾ રાજસ્થાનમાં આજે મુખ્ય પ્રધાન અશોક ગેહલોત અને રાજ્યપાલ કલરાજ મિશ્ર વચ્ચે ફરી એકવાર નૉટિસનૉટિસની રમત રમાઈ. આજે કેબિનેટની બેઠક પછી મુખ્યપ્રધાને ફરી એકવાર રાજ્યપાલના ત્રણ પ્રશ્નોના જવાબ સાથે તેમજ ભૂતકાળમાં રાજ્યપાલે ટૂંકી નોટિસ પર વિધાનસભા સત્ર બોલાવ્યું હોવાનાં ઉદાહરણો સાથે ૩૧ જુલાઈએ સત્ર બોલાવવાના અનુરોધ સાથે પ્રસ્તાવ મોકલ્યો. પરંતુ બીજી તરફ કૉંગ્રેસ માટે ચિંતાજનક સમાચાર બસપ તરફથી છે જેના વિશે ગઈકાલે અહીં લખાયું હતો પરંતુ આજે તેમાં નવો ઘટનાક્રમ એ છે કે બસપનાં પ્રમુખ માયાવતીએ કોંગ્રેસ દ્વારા તેના છ-છ ધારાસભ્યોને પોતાના પક્ષમાં પલટો કરાવવા સામે ઉચ્ચ ન્યાયાલય અથવા તો જરૂર પડે તો સર્વોચ્ચ ન્યાયાલયમાં જવા ચેતવણી આપી છે. આની સામે કૉંગ્રેસનાં નેત્રી પ્રિયંકા ગાંધીએ જવાબ આપ્યો છે કે ભાજપનાં અઘોષિત પ્રવક્તા ભાજપની મદદ માટે વ્હિપ આપી રહ્યાં છે.

◾ રાજકારણ આનું નામ! ચૂંટાયેલા પ્રતિનિધિ ન હોવા છતાં લોધી એસ્ટેટ પર બહુ ઓછાં ભાડાં પર અને મોંઘા તેમજ ભવ્ય એવા બંગલામાં રહેતા પ્રિયંકા ગાંધીને આ બંગલો ખાલી કરવાનો સરકારે આદેશ આપ્યો હતો. આ બંગલો ભાજપના સાંસદ અનિલ બલોનીને ફાળવાયો હતો. પ્રિયંકાએ રાજરમતમાં બલોનીને ચા માટે પત્ર લખીને આમંત્રણ આપ્યું! આનો જવાબ આપતા બલોનીએ વળતો પત્ર લખ્યો કે કેન્સરની સારવાર કરાવીને હમણાં જ દિલ્લી આવ્યો છું અને ડૉક્ટરોએ સલાહ આપી છે કે થોડો સમય ઘરે જ આરામ કરવો. બલોનીની વાત સાચી પણ છે. કોરોના કાળમાં સાજા હોય તો પણ એકબીજાના ઘરે જવાનું ટાળવું જોઇએ અને લાગણીશીલ થઈને અથવા તો રાજરમત કરતા કોઈને પોતાના ઘરે આમંત્રિત પણ ન કરવા જોઈએ. પ્રિયંકાના ચાના આમંત્રણની સામે જોકે બોલોનીએ પોતે આ બંગલામાં રહેવા જાય તે પછી પ્રિયંકાને ભોજન પર આવવા આમંત્રણ આપીને રાજ રમત કરી લીધી અને તેમણે કહ્યું કે હું તમને ઉત્તરાખંડની વિશેષ વાનગીઓ મુંડવેની રોટલી, ઝંગોરની ખીર, પહાડી રાયતા, ભટ્ટની ચુઠકની જમાડીશ.

◾ કોરોનાની સ્થિતિ થાળે પડી રહી નથી. રસીની આશા જરૂર જાગી છે પરંતુ તે બજારમાં ક્યારે આવશે તે કહી શકાય તેવી તેમ નથી. આથી ગૂગલે ભારત સહિત સમગ્ર વિશ્વમાં તેના કર્મચારીઓ માટે ઘરેથી કામ કરવાનું છેક આવતા વર્ષની ૩૦ જૂન સુધી લંબાવી દીધું છે.

◾ ભારતીય વાયુ દળના જીવિત સૌથી વયોવૃદ્ધ સ્ક્વૉર્ડન લીડર લડાકુ પાઇલૉટ દિલીપસિંહ મજીઠિયા ગઈકાલે સો વર્ષના થયા. વાયુ દળના વડા ઍર માર્શલ આર.કે ભદૌરીયાએ તેમને શુભકામના આપી. દિલીપસિંહ મજીઠિયા ૧૯૪૭માં જ્યારે ભારતને સ્વતંત્રતા મળી ત્યારે નિવૃત્ત થયા હતા.

◾ ભારતમાં વાણી સ્વતંત્રતા અને અભિવ્યક્તિની સ્વતંત્રતાના નામે તમે હિન્દુ ધર્મ વિશે અને તેના દેવી-દેવતાના વિશે ગમે તેમ બોલી શકો, ફિલ્મ, ટીવી, કલાસંસ્કૃતિનાં અન્ય માધ્યમો અને સોશિયલ મીડિયા પર અભદ્રતા દેખાડી શકો પરંતુ ઇસ્લામી દેશોમાં આવું શક્ય નથી. તુર્કીમાં ટિકટૉક પર અભદ્ર ડાન્સના વિડિયો મૂકવા માટે અનેક યુવતીઓને ગઈ કાલે બે વર્ષની સજા સંભળાવામાં આવી. ઇજિપ્તના કુટુંબના મૂલ્યો અને સિદ્ધાંતોના ઉલ્લંઘન માટે તેમને ત્રણ લાખ ઇજિપ્શિયન પાઉન્ડ (અંદાજે રૂ. ૧૪ લાખ)નો દંડ પણ ફટકારવામાં આવ્યો. અને ભારતના યુવાધનને કેટલી હદે આ વાણી અને અભિવ્યક્તિની સ્વતંત્રતાના નામે ભટકાવી દેવામાં આવ્યું છે કે ટિકટૉક પર પ્રતિબંધ મૂકાયો તો કેટલાક સ્વઘોષિત ટિકટૉક સ્ટારે સરકારના નામે છાજિયાં લીધાં હતાં.

◾ પરંતુ હિન્દુ દેવીદેવતાઓના અપમાન સામે માત્ર શાબ્દિક વિરોધના કારણે હવે ભારતમાં જ નહીં, વિદેશમાં પણ તેનું અપમાન કરવાની ફેશન થઈ ગઈ છે. એમેઝૉન હોય કે બીજી ઘણી કંપનીઓનાં ઉત્પાદનો દ્વારા દેવી-દેવતાઓના અપમાનનાં ઉદાહરણો ભૂતકાળમાં આવ્યાં છે. હવે નરેન્દ્ર મોદીના ખાસ મિત્ર અને ઈઝરાયેલના વડા પ્રધાન બેન્જામીન નેતાન્યાહુના દીકરા યૈર (Yair)નું નામ આવા લોકોમાં જોડાઈ ગયું છે. રવિવારે ૨૬ જુલાઈએ યૈરે દુર્ગા માતાની તસવીર ટ્વિટ કરી હતી જેમાં તેણે દુર્ગા માના ચહેરાની જગ્યાએ લિયાત બેન એરીનો ચહેરો લગાડી દીધો હતો. નેતાન્યાહુની સામે ભ્રષ્ટાચારના જે કેસો ચાલી રહ્યા છે તેમાં લિયાત સરકારી વકીલ છે. મા દુર્ગાના હાથની ચેષ્ટા પણ ગંદી હતી. યેરીને તેના ભારતીય મિત્રોએ જાણ કરી એટલે તેણે માફી માગી લીધી. યેરી અને ભારતના જે સ્ટેન્ડ અપ કૉમેડિયનો, ફિલ્મવાળા, ટીવી સિરિયલવાળા, એમ. એફ. હુસૈન (જે હવે જીવિત નથી) વગેરેમાં ફેર એ છે કે ભારતના આ હિન્દુવિરોધીઓ તો હિન્દુ ધર્મને જાણે છે. તેઓ ઈરાદાપૂર્વક આવું કરે છે કારણકે તેમ કરવાથી તેમને મનોરંજન ક્ષેત્ર, લિબરલ અને બુદ્ધિજીવી વર્તુળમાં કામ, પ્રશંસા અને એવૉર્ડ મળે છે.

◾ આપણા દેશમાં આપણી ભાષાને આપણે ભલે હીન નજરે જોતા હોઈએ પરંતુ અમેરિકામાં આપણી ભાષાને માનની નજરે જોવામાં આવે છે તેનું ઉદાહરણ માઇક્રોસૉફ્ટ કંપની જે શહેરમાં છે તે સિએટલમાં શાળાનાં બાળકોને જે પત્ર મોકલવામાં આવ્યા છે તે અંગ્રેજીની સાથે હિન્દીમાં પણ છે. જ્યારે આપણે ત્યાં આપણી ભાષામાં વાતચીત પત્ર વ્યવહારને નીચી નજરે જોવામાં આવે છે. ગુજરાતમાં તો પરિસ્થિતિ આનાથી પણ ખરાબ છે બે ગુજરાતી એક બીજાને જાણતા હોય તોપણ ટીવી પર કે ફૉન પર વાતચીતમાં વચ્ચેવચ્ચે અંગ્રેજી વાક્યોના અને તે પણ ખોટા અંગ્રેજી વાક્યોના પ્રયોગ કરે છે અને તેમાં ગર્વ અનુભવે છે. મા-બાપ પોતાના બાળકને અંગ્રેજી કેટલું આવડે છે તેનું ગૌરવ કરે છે અને તેને અંગ્રેજી શાળામાં મૂકવામાં પોતાનું સ્ટેટસ જુએ છે.

સુરતની વૈદેહી વેકરિયા અને રાધિકા લાખાણીએ પૃથ્વી પાસે એક લઘુ ગ્રહ શોધ્યો હોવાનું બહુમાન મેળવ્યું છે

◾ ભારત અને ખાસ કરીને ગુજરાત માટે ગૌરવની ઘટના એવી બની છે કે સુરતની બે વિદ્યાર્થીઓએ પૃથ્વીની પાસે એક લઘુ ગ્રહ (ઍસ્ટરૉઇડ) શોધી કાઢ્યો છે. અમેરિકી અવકાશ વિજ્ઞાન સંસ્થા નાસાએ તેનું નામ HLV2514 રાખ્યું છે. ઇન્ટરનેશનલ ઍસ્ટ્રૉનૉમિકલ સર્ચ કૉલૉબૉરેશન અને ટૅક્સાસની હાર્ડિન સિમન્સ યુનિ. સાથે મળીને સ્પેસ ઇન્ડિયાએ આયોજિત કરેલા ‘અખિલ ભારતીય લઘુગ્રહ શોધ અભિયાન ૨૦૨૦’માં સુરતની ૧૪ વર્ષીય વૈદેહી સંજય ભાઈ વેકરીયા અને રાધિકા પ્રફુલભાઈ લાખાણીએ ભાગ લીધો હતો.

અભિનેત્રી કુમકુમ

◾ જે લોકો બ્લેક એન્ડ વ્હાઇટ ફિલ્મોના જાણકાર અને શોખીન હશે તેમના માટે આજે દુઃખના સમાચાર આવ્યા. અભિનેત્રી કુમકુમનું અવસાન થયું. તેઓ ૮૬ વર્ષનાં હતાં. તેમણે ૧૦૦થી વધુ ફિલ્મોમાં કામ કર્યું હતું જેમાં ‘આરપાર’, ‘મધર ઇન્ડિયા’, ‘લલકાર’, ‘કોહિનૂર’, ‘ઉજાલા’, ‘નયા દૌર’, ‘પ્યાસા’, ‘મિસ્ટર ઍક્સ’ અને ‘આંખે’ જેવી ફિલ્મો કરી હતી. જૉની વૉકરના અભિનેતા દીકરા નસીર ખાને તેમનાં નિધનની જાણકારી આપી. કુમકુમનું મૂળ નામ ઝૈબુન્નિસ્સા હતું. તેઓ મૂળ બિહારનાં હતાં. અભિનેતા-નિર્દેશક ગુરુદત્તે તેમની શોધ કરી હતી. ‘આરપાર’નું શીર્ષક ગીત તેમના પર ફિલ્માવાયું હતું. ‘સીઆઈડી’નું ‘એ દિલ હૈ મુશ્કિલ’ પણ જૉની વૉકર સાથે તેમના પર ફિલ્માવાયું હતું. ‘મધુબન મેં રાધિકા નાચે રે’ ગીત પણ તેમના પર ફિલ્માવાયું હતું. તેમણે શમ્મી કપૂર, ધર્મેન્દ્ર, કિશોરકુમાર. પ્રાણની અભિનેત્રી તરીકે પણ કામ કર્યું હતું. ભોજપુરી ભાષાની સૌ પ્રથમ ફિલ્મ ‘ગંગા મઇયા તોહે પિયારી ચઢાઈબો’ની હિરોઇન તેઓ હતાં. તેમણે ૧૯૭૫માં સજ્જાદ અકબર ખાન સાથે લગ્ન કર્યાં અને પતિ સાઉદી અરેબિયામાં કામ કરતા હતા તેથી કુમકુમ પણ હિન્દી ફિલ્મોને ‘આવજો’ કહી ત્યાં ચાલ્યાં ગયાં. જોકે ત્યાં વીસ વર્ષ રહ્યાં પછી તેઓ ભારત પાછા આવી ગયા હતા પરંતુ જાહેર જીવનથી દૂર રહ્યાં હતાં. તેમને એક દીકરી અંદાલીબ ખાન છે.

(તસવીર ૧: અમેરિકાનાં યુદ્ધ વિમાનો ચીનની સરહદની એકદમ નજીક પહોંચી ગયા હતા, તસવીર ૨: નરેન્દ્ર મોદી મસ્જિદમાં જાય તો વાંધો નહીં, પણ શ્રી રામમંદિરનું ભૂમિપૂજન કરવા જાય તો સેક્યુલરોના પેટમાં મરોડ કેમ ઊઠે છે? તસવીર ૩: વાયુ દળના જીવિત સૌથી વયોવૃદ્ધ લડાકુ પાઇલૉટ દિલીપસિંહ મજિઠિયા તસવીર ૩: સુશાંતસિંહ, તેના પિતા અને રિયા ચક્રવર્તી, તસવીર ૪: અભિનેત્રી કુમકુમ)

(આ અને આવા વધુ સમાચારો મેળવવા સબસ્ક્રાઇબ કરો: SAT- સચ આપ તક)

આ લેખ આપને ગમ્યો? આ વેબસાઇટ પર આવા લેખો વાંચવા મળતા રહે તે માટે સપૉર્ટ કરો.
અહીં ક્લિક કરો.

You may also like

Leave a Comment