Home » કાયદા પંચની વાહિયાત ભલામણ કચરા ટોપલીમાં પધરાવવી જોઈએ

કાયદા પંચની વાહિયાત ભલામણ કચરા ટોપલીમાં પધરાવવી જોઈએ

by Jaywant Pandya

કાયદા પંચે વાહિયાત ભલામણ કરી છે. તેણે કહ્યું છે કે જુગાર અને સટ્ટાને અટકાવી શકાય તેમ નથી તેથી તેને કાયદા દ્વારા નિયંત્રિત કરવાનું શ્રેષ્ઠ રહેશે! કાયદાપંચે આ માટે ૧૮ વર્ષની ઉંમર અથવા તેનાથી વધુ ઉંમર ને યોગ્ય જણાવી છે. તેણે વધુમાં કહ્યું છે કે જુગાર અને સટ્ટાના તમામ વ્યવહારો ને સંચાલક અને ખેલાડીના આધાર પાન કાર્ડ સાથે જોડી દેવા જોઈએ.

કાયદા પંચનો અહેવાલ તો એમ પણ કહે છે કે કેસિનો અથવા ઓનલાઇન રમત ઉદ્યોગમાં વિદેશી સીધું રોકાણ મેળવવા માટે એફડીઆઈ પૉલિસી હોવી જોઈએ! જોકે તેણે એમ પણ કહ્યું છે કે મેચ ફિક્સિંગ અને રમતોમાં થતી છેતરપિંડી ને ખૂબ આકરી સજા સાથેના ફોજદારી ગુનાઓ ગણવા જોઈએ.

કાયદા પંચના એક સભ્યે બહુમતી સભ્યો વિરુદ્ધ પોતાની અસંમતિ વ્યક્ત કરતી નોંધ આપી છે. પ્રાધ્યાપક શિવ કુમારે કહ્યું છે કે રમતોમાં સટ્ટો સામાન્ય છે તે મુદ્દો સુપ્રીમ કૉર્ટે ક્યારેય કાયદા પંચને આપ્યો નથી અને કાયદા પંચનો અહેવાલ સર્વગ્રાહી નથી. તેમણે એમ પણ કહ્યું છે કે “આ દેશમાં કોઈ પણ પ્રકારના જુગારને અનુમતિ આપી શકાય નહીં. સરકારની નીતિ સામાન્ય રીતે જુગાર અને સટ્ટાને મંજૂરી નહીં આપવાની છે અને મને શંકા છે કે કાયદા પંચને ભલામણ થી બિનતંદુરસ્ત અને અનિચ્છનીય ચર્ચા સર્જાશે.”

પોતાની ભલામણોમાં કાયદા પંચે કહ્યું છે કે સટ્ટાના તમામ પ્રકારો અને સર્વગ્રાહી કાયદામાં સમાવી લેવા જોઈએ ચાહે તે ઑનલાઈન હોય કે પછી અલગ-અલગ મીડિયા પર ઓફર કરાતા હોય.

ભારતમાં અંદાજે ૩૬૦૦ અબજ રૂપિયાનું જુગાર અને માર્કેટ છે તેમ ૨૦૧૦ના કેપીએમજી રિપોર્ટમાં કહેવાયું છે. ૨૦૧૮માં આ આંકડો ઘણો વધ્યો હોઈ શકે.

અહીં લોટરીને પણ યાદ કરી લઈએ. ૧૩ રાજ્યો સિવાય સમગ્ર ભારતમાં લોટરી પર પ્રતિબંધ છે. સુપ્રીમ કૉર્ટે કહ્યું છે કે લોટરી વેચવાના અધિકારને મૂળભૂત અધિકાર ગણી શકાય નહીં. પશ્ચિમ બંગાળ, મહારાષ્ટ્ર, કેરળ, પંજાબ, મધ્યપ્રદેશ, ગોવા, આસામ, અરુણાચલ પ્રદેશ, મેઘાલય, મણિપુર અને નાગાલેન્ડમાં લોટરી વેચવાની છૂટ છે જ્યારે કેરળમાં તો રાજ્ય સરકાર પોતે જ લોટરી બહાર પાડે છે!

જો આ રીતે જ જેના પર અંકુશ લાવી ન શકાતો હોય તેને કાયદા દ્વારા માન્ય કરવાનું હોય તો તો પછી ડ્રગ્સ, દારૂ, વેશ્યાવૃત્તિ, ચોરી, લૂંટફાટ, હત્યા, એક કા દો એવી પૉન્ઝી સ્કીમ બધાને કાયદા દ્વારા માન્ય કરવાની વાત આવતી કાલે આવશે.

આ બધાને કારણે સરકારને આવક તો થશે પરંતુ દરેક બાબતમાં આવક ન જોવાની હોય તેની સામાજિક અસરો પણ વિચારવી પડે.

કાયદા પંચે એવી પણ વાહિયાત દલીલ કરી છે કે જો સટ્ટો અને જુગાર કાયદેસર હોત તો મહાભારતનું યુદ્ધ થયું જ ન હોત. આ રીતે તો એમ પણ કહી શકાય કે જો વ્યભિચાર કાયદેસર હોત તો રામાયણનું યુદ્ધ થયું જ ન હોત.

સરકારે કાયદા પંચના આ અહેવાલને અને ભલામણોને કચરા ટોપલીમાં જ પધરાવવા જોઈએ.

આ લેખ આપને ગમ્યો? આ વેબસાઇટ પર આવા લેખો વાંચવા મળતા રહે તે માટે સપૉર્ટ કરો.
અહીં ક્લિક કરો.

You may also like

Leave a Comment